Битка

Трошам зборови на тебе,
како да ги имам во изобилство –
потрошен материјал,
кој лесно ќе го надоместам.

Давам дел од себе,
кој не знам дали ќе биде прифатен
или разбран.

Поинаку – не можам.
Не знам.
Не сакам.

Не сакам да се борам во битка,
која знам дека ќе ја изгубам.

Битка во која секогаш победници сте ти
и она што го будиш во мене.

Advertisements
Битка

Црвено

Кога ќе помислам на црвено
ми текнува на фустан
кој цврсто ги гушнал облините околу кои се обвиткал
мамејќи восхитени погледи од сите в просторијата.

Кога ќе помислам на црвено
ми текнува на црвени усни,
полуотворени во вечна нема воздишка,
која сите посакуваат да е наменета за нив,
сонуваат за тоа,
копнеат.

Кога ќе помислам на црвено
ми текнува на осамена роза,
која чека да го исполни своето значење
лесно висејќи од нечија треперлива рака.

Кога ќе помислам на црвено
ми текнува на тој невидлив оган,
кој гори в надеж дека ќе се спои со пламенот спроти него
па заедно да го создадат вителот на страста.

Црвено

Ти само смеј се

Ти само смеј се
а јас ќе те гледам,
сонувајќи дека јас!
те смеам,
дека се тоа е само за мене.

Ти само смеј се
а јас ќе те слушам
уживајќи во таа неописива смеа,
тој звук, кој по сите правила на музикалноста
не би требало да звучи
како откинато парче сино небо
од далечен пролетен ден.

Ти само насмевни се
и јас ќе потонам во вдлабнатината,
која се создава на аголот од твоите усни,
копнеејќи да ги спуштам моите
токму таму.

Ти само смеј се,
а јас ќе умирам
истурајќи ја сентименталноста
во песни за невозвратена љубов
и емоции без насока и цел.

Ти само смеј се,
ти само смеј се,
ти само смеј се.

Ти само смеј се

Штета!

Замижувам кога ќе надојдат спомените

но наместо да заминат
тие се враќаат посилни –
лернејска хидра на која веќе милиони пати
си и ја отсекол главата.

Па одам по линијата на помал отпор
и им се предавам –
одеднаш сме пак на старото место
чекорејќи на фино избалансираниот раб,
без никогаш да се охрабриме да скокнеме.

Некогаш можеби и ќе имавме шанса
заедно да паѓаме бесконечно
никогаш не искусувајќи го ударот од плочникот
кој неизбежно враќа во реалност.

Изгледа сепак ќе останеме само фуснота
во приказната на светот
засекогаш осудена на заборав.

Штета!

Штета!

Контраст

Ако ме прашаат
Што значи тоа да те сакам
Не ќе знам да им одговорам
Затоа што и самата
Тоа не го разбирам.

Ти си мир и немир,
Бура и мирно море,
Крајот и почетокот
На се.

Плачам и се смеам,
Боли, но болката е слатка –
Е тоа е мојата љубов кон тебе.

Контраст –
На хартија, на небо,
Во ноти, во сите проклети моменти кога те нема.
Само изгревот и залезот
Знаат како ми е.

Контраст

Ме боли (тоа што)

Ме боли тоа што го сакам толку многу –
што не можам да се задржам
да не плачам од страв.

Ме боли тоа што не можам да сум поинаква,
послободна,
подобра.

Ме боли тоа што знам дека еден ден ќе замине,
а не сакам да го пуштам
дури ни за еден безначаен момент.

Ме боли тоа што не знам друг начин да го сакам
освен овој проткаен со страв
и чувство на безнадежност во длабоката дупка на мислите.

Повеќе би сакала секој ден да умирам
и да се раѓам до него
отколку да проживеам и ден без него.

Ќе се обидам да сум повеќе од тоа што сум,
за него, но и за мене,
тоа е единствениот начин на кој
нема да исчезне како трошка прав од мојот живот.

Ме боли (тоа што)